Aðalfundarboð

Fundarboð

Aðalfundur Landssamtaka landeigenda á Íslandi verður haldinn fimmtudaginn 16. febrúar á Hótel Sögu, sal Harvard II, og hefst hann klukkan 13⁰⁰.

Dagskrá fundarins:

• Hefðbundin aðalfundarstörf samkvæmt samþykktum samtakanna.
• Málþing klukkan 15⁰⁰.
  • Framsögumaður Róbert Spanó, forseti lagadeildar Háskóla Íslands, flytur erindið: „Vernd eignarréttar samkvæmt mannréttindasáttmála Evrópu og réttur landeigenda“.
  • Framsögumaður Karl Axelsson, hæstarréttarlögmaður, flytur erindið: „Hversu langt verður gengið? Fáeinar hugleiðingar um heimildir almenna löggjafans til inngripa í stjórnarskrárvarin eignarrétt landeigenda“.

Fundurinn er öllum opinn en landeigendur eru sérstaklega hvattir til að mæta.

Fyrir hönd stjórnar,

Örn Bergsson

Ný heimasíða LLÍ

Velkomin á nýja síðu Landssamtaka Landeigenda. Hér munu reglulega koma inn nýjar fréttir en að auki má hér finna fundargerðir stjórnar LLÍ, ýmsar upplýsingar um lög og reglur, ný lagafrumvörp, umfjöllun um þjóðlendumál og fleira.

LLÍ um breytingar á stjórnarskrá

Landssamtök landeigenda hafa sent Alþingi athugasemdir sínar við tillögu að frumvarpi til nýrrar stjórnarskrár. Þær má lesa í heild sinni hér en LLÍ leggur áherslu á að tillaga þessi að frumvarpi til nýrrar stjórnarskrár sem samin var stjórnlagaráði fái vandaða meðferð.  Landssamtökin leggjast eindregið gegn hugmyndum um að tillagan verði borin undir þjóðaratkvæði í óbreyttri mynd og vænta þess að Alþingi víki sér ekki undan þeirri skyldu að koma efnislega að endurskoðun nýrra stjórnskipunarlaga teljist brýn þörf til breytinga á stjórnarskrá lýðveldisins.  LLÍ telja margvíslega annmarka á fram kominni tillögu sem lesa má í athugasemdum sem LLÍ sendi Alþingi. Stjórn LLÍ telur þörf á að fara varlega í að umbylta núgildandi stjórnarskrá en að hennar mati á stjórnarskrá að vera hnitmiðuð í orðalagi og inntak einstakra greina skýrt og eins laust og hægt er við gildishlaðið málskrúð. Það á ekki síst þegar kveðið er á um réttindi  almennings sem snerta skulu þau réttindi einstaklinga sem nú eru varin í lögum og gildandi stjórnarskrá þar með talinn eignarréttinn.

Hvetjum við félagsmenn og aðra til að kynna sér athugasemdir LLÍ við einstaka greinar sem finna má hér.

Síðasti stjórnarfundur og fundur með Vegagerðinni

1. desember 2011

Síðasti fundur stjórnar LLÍ  fór fram síðastliðinn 1. nóvember og voru þar ýmis mál rædd. Stjórnin hafði farið á fund með Hrein Haraldssyni vegamálastjóra, Gunnari Gunnarssyni aðstoðarvegamálastjóra og Stefáni Erlendssyni, lögfræðingi. Stjórnin óskaði eftir þessum fundi til að ræða samskipti Vegagerðarinnar og landeigenda. Gekk fundurinn vel og vegagerðarmenn tóku vel í að senda LLÍ  yfirfarnar verklagsreglur sínar um samskipti við landeigendur til umsagnar. Rædd voru ákvæði í gildandi vegalögum um að Vegagerðin sé lögformlegur eigandi að því landi sem undir veg fer og það að þessi svæði séu komin með sérstök fasteignanúmer. Það er að mati stjórnar LLÍ, óheppilegt og vekur upp margar spurningar og álitaefni. Stjórn LLÍ telur að eigi þetta fyrirkomulag að vera til frambúðar þurfi að skýra réttarfarslega stöðu viðkomandi landsvæða og hvaða áhrif það hafi á þær jarðir sem áður áttu landið og hvað gerist ef vegi er svo breytt síðar. Einnig var rætt um bætur vegna lands sem tekið er eignarnámi vegna vinnu Vegagerðarinnar og um mikilvægi þess að fengið sé hlutlaust mat ef samkomulag næst ekki á milli Vegagerðar og landeigenda og það að hugsanlega þyrfti að einfalda og stytta þannig það ferli.

Skorað var á forustumenn Vegagerðarinnar að hafa samráð við landeigendur með góðum fyrirvara, þegar framkvæmdir eru fyrirhugaðar svolandeigendur upplifi ekki að þeir séu sniðgengnir.

Á fundinum lýstu stjórnarmenn yfir vonbrigðum sínum með úrskurð Óbyggðanefndar á Tröllaskaga þar sem sérstaklega kom til tals sú undrun að enn séu afmarkaðar landspildur gerðar að þjóðlendum. Þetta þykir stjórnarmönnum LLÍ ekki samræmast upphaflegum markmiðum laganna eins og þau voru kynnt í upphafi. Enda voru einnig á fundinum ræddar breytingar á Þjóðlendulögunum en það mál hefur oft áður komið til tals hjá stjórninni. Hefur stjórnin ákveðið að fela Sigurði Jónssyni, lögmanni, að semja uppkast að frumvarpi um slíkar breytingar svo hægt væri að leggja mótaðar hugmyndir fyrir þingmenn.

Formaður hafði fengið fregnir af því að hafin sé vinna við ný landgræðslulög en ekki hefur verið leitað til LLÍ vegna þess en stjórnin mun fylgjast með því máli enda telur hún eðlilegt að LLÍ komi að þeirri vinnu. Formaður kynnti einnig bréf frá Landeigendafélagi Álftaness, þar sem sótt er um fjárstuðning vegna málaferla fyrir Mannréttindadómstólnum.  Samþykkt var að veita þeim 300.000 króna styrk sem greiddur verður að málaferlunum loknum.

Ýmis önnur mál voru rædd en hér má lesa fundargerð stjórnarfundarins.