15. febrúar 2008
Örn Bergsson á Hofi í Öræfum var kjörinn formaður nýrrar stjórnar Landssamtaka
Örn Bergsson á Hofi í Öræfum var kjörinn nýr formaður Landssamtaka landeigenda á Íslandi. Fráfarandi formaður Guðný Sverrisdóttir gaf ekki kost á sér til formennsku en situr áfram í stjórn.
landeigenda á Íslandi á aðalfundi þeirra síðdegis í gær. Guðný Sverrisdóttir, sveitarstjóri í Grýtubakkahreppi, gaf ekki kost á sér til endurkjörs sem formaður en situr áfram í stjórn. Henni voru þökkuð sín störf sem formaður í þágu samtakanna á þeirra fyrsta starfsári. Auk Arnar og Guðnýjar voru kjörnir í aðalstjórn Ólafur H. Jónsson, Reykjavík, Óðinn Sigþórsson í Einarsnesi og Rögnvaldur Ólafsson í Flugumýrarhvammi. Óðinn og Rögnvaldur áttu ekki sæti í fráfarandi stjórn. Nýir varastjórnarmenn eru Aðalsteinn Jónsson í Klausturseli, Hrafnkell Karlsson á Hrauni, Jóhannes Sigfússon á Gunnarsstöðum, Anna Guðrún Edvardsdóttir, Bolungarvík, og Gunnar Sæmundsson í Hrútatungu.
Aðalfundurinn stóð yfir í ríflega þrjár klukkustundir og sóttu hann yfir 60 manns víðs vegar að af landinu. Umræður voru afar líflegar eftir að gestir fundarins höfðu flutt erindi sín: Árni M. Mathiesen fjármálaráðherra um stöðu þjóðlendumála af sjónarhóli ríkisins og Ragnar Aðalsteinsson hæstaréttarlögmaður um afréttarmálefni fyrir dómstólum. Sá síðarnefndi taldi að þjóðlendustríð landeigenda og ríkisins myndi að óbreyttu vara til ársins 2040!
Í máli fjármálaráðherra bar helst til tíðinda yfirlýsing um að hann hefði falið lögmanni ríkisins að falla frá málarekstri fyrir dómstólum vegna Esjunnar. Ríkið myndi með öðrum orðum sætta sig við þá niðurstöðu svokallaðrar óbyggðanefndar að „jarðir sem liggja hvorum megin að Esjufjöllum teljist ná saman í miðfjalli“. Ráðherra sagði niðurstöðu sína í samræmi við ákvörðun ríkisins á síðasta ári um að una þeirri niðurstöðu óbyggðanefndar að draga ekki í efa eignarrétt jarða beggja vegna Smjörfjalla. Hann bætti jafnframt við að í þjóðlendumálum myndi ríkið hér eftir fara „að nokkru leyti hægar í sakirnar en hingað til hefur verið stefnt að“ og að fylgt verði því verklagi að „sem mest af gögnum liggi fyrir áður en til kröfulýsingar ríkisins kemur.“
Aðalfundarfulltrúar fögnuðu yfirlýsingu fjármálaráðherrans og töldu hana skref í rétta átt. Þeir, og sömuleiðis lögmennirnir Ólafur Björnsson og Ragnar Aðalsteinsson, töldu hins vegar rökrétt eða jafnvel óhjákvæmilegt að ráðherrann stigi annað skref strax í framhaldinu og beitti sér nú fyrir því að taka upp að nýju ósanngjarna og fráleita þjóðlendudóma varðandi jarðirnar Fjall, Breiðamörk, Ærfjall og Stafafell í Austur-Skaftafellssýslu og falla þar frá landakröfum ríkisins. Fram kom á fundinum að dómum Hæstaréttar Íslands vegna jarðanna fjögurra hefði öllum verið vísað til meðferðar hjá Mannréttindadómstóli Evrópu.
